صابر على ليالي الغربة

صابر على ليالي الغربة
وقدها
وأعديها وأعدي أكبر منها
بس آه لو محسش بمرها
لكن بردك صابر وقدها

ساعات بسرح وأسابق الريح
وأقول هانت إللي باقي تفاريح
لكن فجأة ألقاني سابق الأيام
وعايش مع الأوهام
وبدل ما أمشي يوم لقدام
ألقاني رجعت لورا أيام

مش عارف أنا ليه مش ببكي
رغم إللي حواليه كله يبكي
وليه مبكيش والعمر أحلاه راح
وليه مبكيش والأحبة نصهم راح
والنص التاني حبي من قلبه راح
يمكن شايل دمعي علشان ابكي الغربة
مش غربتي دي لا غربة القربة
خايف بعد غربتي أحس في قربتي غربة
لما تكون في وسط أهلك وتحس بالغربة
ساعتها فعلا تبقى الحياة صعبة

ومن كربتي علشان تنتهي الغربة
بقول صابر وقدها
وأعديها وأعدي أكبر منها
والله لولا إنسانة بتدعي ربها
أنه يحفظ وينجي أبنها
لكان إللي بيكتب بقلمه دلوقتي
انتهى